MÀNDIŊ
Naaj wi tàng may dox man rekk
Ñax mi bari mbooy gi ni ñareet
May waaxu gaaw ne’b sareet
Ma xool ndey joor lépp ni selaw
Xool càmmooñ lépp di nelaw
Xool ci kanam séenu ma dara
Geestu gannaaw gisu ma dara
Màndiŋ mi yaatu ta raglu lool
Saa’m xel di rabat ak di xalaat
Ñall wi gudd bari ñax ta xat
Lu yëngu ma tiit fu ne ma xool
Xel indil ma la maam daan léeb
Àll bu yaatu ta bari’y mala
Bari’y njanaaw ak léppi balaa
Ba tax lu ma waaxu diko xeeb
Des picc yiy sab yamb yiy biiw
Soccet yiy tëb def am ndiiraan
Gunóor’ak mellent lépp di raam
Tan yi ci téeg naaw di ma tiim
Dara ni yoxyox saa’w fit ni térét
Ma dëgg i tànk mujj ni yoleet
Mu ni ñoxñox saa’g noo ni tekk
Ma ñaadam ñaadami ni meŋŋ
Ma takk saa‘w fit dellu ànd ak dal
Yokk saa jéego ba mel ni kuy daw
Ngir ñibbi ak waaxu mu gaaw
Ta bañ ni wëqet mel ne’b ragal
Wolof Njaay neena mere Màndiŋ mana waaxoo ko gën.